ՄԻՊ գրասենյակը կրկնակի գրությամբ դիմել է Երևանի քաղաքապետին` Փակ շուկայի հարցով
Մարդու իրավունքների պաշտպանի գրասենյակը Փակ շուկայում առանց նախագծի շինարարական աշխատանքներ իրականացնելու վերաբերյալ հարցադրումեներով գրություններ է ուղարկել պատկան մարմիններին` մշակույթի նախարարություն, Երևանի քաղաքապետարան: Մարդու իրավունքների պաշտպանի գրասենյակի քաղաքացիական և քաղաքական իրավունքների վարչության պետ Մանուշ Միրզոյանը Panorama.am-ին տեղեկացրեց, որ քաղաքապետարանից պատասխան գրությամբ իրենց հայտնել են, որ դեռևս 2012 թվականին, երբ կառուցապատողը առանց նախագծի շինաշխատանքներ էր սկսել ու առանց թույլտվության քանդել էր մշակութային հուշարձանի որոշ հատվածներ, Երևանի քաղաքապետի որոշմամբ ենթարկվել է վարչական պատասխանատվության` 200 հազար դրամի չափով (14.03.2012):
Գրությամբ նաև տեղեկացվում է, որ նշված տուգանքը նշանակելուց հետո նույն ընկերության կողմից շինության տանիքում շարունակվել են շինարարական աշխատանքները: «Փաստի կապակացությամբ կրկին քաղաքապետարանի կողմից 08.01.2013-ին կազմվել է վարչական իրավախախտումների վերաբերյալ կրկնակի արձանագրություն, որով նախատեսվում է իրավախախտողին ենթարկել վարչական պատասխանատվության 2 միլիոն 500 հազար դրամի չափով, իսկ շինարարարական աշխատանքները դադարեցվել են»,-փոխանցեց ՄԻՊ գրասենյակի քաղաքացիական և քաղաքական իրավունքների վարչության պետը: Սակայն նամակով չի տեղեկացվել, իրավախախտ կառուցապատողը այդ երկրորդ տուգանքը վճարել է, թե ոչ. «Չունենք ինֆորմացիա` քաղաքապետի կողմից երկրորդ վարչական պատասխանատվության ենթարկելու մասին որոշումը կայացվել է թե ոչ, միաժամանակ համայնքի ղեկավարը` քաղաքապետը, ով կանխարգելում է ինքնակամ շինարարության կառուցումը, պետք է միջոցներ ձեռնարկի նաև դրանց հետևանքները վերացնելու ուղղությամբ: Քանի որ Փակ շուկայի արտաքին տեսքը քանդվել է, հետևանքների վերացումը ենթադրում է նորից վերականգնում, այդ մասով էլ համայնքի ղեկավարը պետք է համապատասխան միջոցներ ձեռնարկի: Իսկ քանի որ քաղաքապետարանը գրությամբ չէր անդրադարձել այդ հարցերին, կրկնակի գրություն ենք գրել քաղաքապետին` ակնկալելով հարցերի պատասխանները: Դեռևս պատասխան չունենք»:
Մ. Միրզոյանը նաև ներկայացրեց իրենց կողմից մշակույթի նախարարությանն ուղղված գրության պատասխանը, որի համաձայն նախարարությունն էլ միջոցներ ձեռնարկել է կանգնեցնելու առանց նախագծի շինարարությունը, դեռևս նախորդ տարի հաղորդում է ուղարկել դատախազություն, քաղաքաշինության նախարարություն, որպեսզի վերջինս պարզի, թե ինչքանով է շուկայում տարվող շինաշխատանքները, քանդման աշխատանքները համապատասխանում քաղաքաշինական նոմերին: «Մշակույթի նախարարությունն առաջարկել է քաղաքապետարանին այն, ինչ մենք` հուշարձանի տեսքի վերականգնում, նաև առաջարկել է թե ինչպես պետք է դա արվի: Նախարարությունը նաև պահանջել է մշակել շուկայի ետնամասի վերակառուցման, պահպանված հատվածների վերականգնման և ուժեղացման նախագիծ: Նախագիծը ներկայացված է, ներկա պահին քննարկվում է մշակույթի նախարարությունում, որից հետո կտրվի եզրակացություն»:
Փաստորեն, ինչպես տեսնում ենք, նույնիսկ տուգանքները, պահանջը` դադարեցնել ապօրինի շինարարությունը, չեն ազդում օրինազանցների վրա. շատ ակտիվորեն շարունակվում է պետության կողմից պահպանվող հուշարձանի այլանդակումը: Հետևաբար ենթադրությունը կարող է լինել մեկը` հարկավոր են այլ պատժամիջոցներ oրենքը խախտողների նկատմամբ:
Նախորդող նորություններ` Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 2
Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 1
Փակ շուկա… Մինչ նախագիծը քննարկվում է, «վանդալը բարբարոսաբար ոչնչացնում է հուշարձանը»
«Փակ շուկայի» ճակատագիրը` փակ դռների հետևում
Փակ շուկայի օրինախախատումների հետ կապված պահանջված փաստաթղթերը քննչականում են (լուսանկարներ)
Բողոքի ակցիա Ծածկած շուկայի դիմաց… Վերադարձրեք նախկին տեսքին և վերջ (տեսանյութ)
Փակ շուկա-«ֆորսմաժոր». Ձեզ ո՞վ էր ասում շենքին ձեռք տալ
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
